ஆறுமுகநேரி இணையத்தளம் அன்புடன் வரவேற்கிறது

You Are Here: Home» Freedom Struggle » சுதந்திரப்போராட்டம்

சுதந்திரப்போராட்டம்

Posted by Unknown on Wednesday, August 03, 2011 | 0 comments

சுதந்திரப்போராட்டம்

நம்முடைய இந்தியத்திருநாட்டில் வெள்ளையர் தங்களுடைய ஆட்சியை 18 19 ஆம் நூற்றாண்டுகளில் நம்முடைய ஒற்றுமையின்மையையும் சுயநலத்தையும் பயன்படுத்திக்கொண்டு வேரூன்றினார். அந்நாள் முதலாக ஆங்காங்கே விடுதலை வீரர்கள் தோன்றி நாட்டு விடுதலைக்காகப் பல்வேறு தியாகங்களைச் செய்துள்ளனர். பொருட்தியாகம் உயிர்த்தியாகம் என தியாக வேள்வியில் புகுந்தனர். இந்த நூற்றாண்டில் “கத்தியின்றி ரத்தமின்றி“ அகிம்சா முறையினைக் காட்டித்தந்த மகாத்மா காந்தி ஜவஹர்லால் நேரு நேதாஜி உள்ளிட்ட பல வீரத்திருமகன்கள் தலைமையில் சுதந்திரப் போராட்டம் தீவிரமடைந்து நம்முடைய நாடு 15.8.1947 இல் விடுதலை பெற்றது. வெள்ளையரின் ஆதிக்கம் வேருடன் அழிந்தது. அச்சுதந்தித்திற்காகத் தங்களுடைய உடல் பொருள் உயிர் ஆகியவற்றைத் தியாகம் செய்தவர்கள் இலட்சக்கணக்கிலாவர். நம்முடைய திருச்செந்தூர்த் தாலுகா சுதந்திரப் போராட்டத்தில் தீவிரமாக ஈடுபட்டது. குறிப்பாக ஆறுமுகநேரி என்ற சிற்றூர் தலைமையேற்று முதலிடம் வகித்தது. முப்பத்து மூன்று தியாகப்பெருமக்களை ஈன்று நாட்டிற்காகக் கொடுத்துள்ளது என்பதை எண்ணி பெருமை கொள்வோம்.


இக்காலநிலை 

இக்காலத்தில் வாழுகின்ற மாணவர்கள் ; இளைஞர்களுக்கு இந்நாடடின் விடுதலையைப் பெறப் போராடியவர்களைப் பற்றிய செய்தியும் வரலாற்றுண்மைகளும் கிடைப்பதில்லை. இவ்வூரிலே பிறந்து வளர்ந்தவனுக்கு இவ்வூரின் தியாக வரலாறு தெரியாமல் இருப்பது தவறு. தூக்குமேடை வரை சென்று வந்த டி.வி.காசிராஜன், இராஜகோபால் இருவரை எத்தனை பேர் அறிவார்கள்? திரைப்படத்தில் மூன்று மணி நேரம் போராளியாக நடிக்கின்ற நடிகர் மீது கொண்டுள்ள பற்று இந்நாட்டிற்காகப் பல ஆண்டுகள் சிறைவாசமும் உயிர்த்தியாகமும் செய்தவர்கள் மீது எந்நாள் திரும்பும்? சில வரலாறுகள் கால வெள்ளத்தில் மாற்றமடைந்து விடுகின்றன. தலைவர்களாக சிலபேர் இருந்தார்கள் தொண்டர்களாக பல பேர் இருந்தார்கள். அந்தத்தியாக மறவர்களுடைய பெயர்களும் வரலாறும் மறக்கப்படாமல் இக்காலத்திலும் எதிர் காலத்திலும் கல்வெட்டு போல ஒளிர வேண்டும்.
அரசியல் மேடைகளில் முழங்கும் இந்நாள் சில அரசியலாளா்கள் போலன்றி நாடடின் விடுதலைக்காக சொந்த வசதிகளையும் பொருளையும் வியாபாரத்தையும் தொழிலையும் உறவுகளையும் உடல்நலத்தையும் இழந்தவர்கள் அந்நாளில் இருந்தனர்.


இறவாப்புகழ் 

இவ்வூரில் பிறந்தேன் வளர்ந்தேன் இருந்தேன் இறந்தேன் என்றில்லாமல் இறவாப் புகழெய்திய மாவீரர்கள் என்னென்ன தியாகங்களைச் செய்தார்கள்? எலும்புகள் நொறுங்கும்படி அடிவாங்கியோர் யாவர்? வீதிகளில் அடிபட்டும் மிதிபட்டும் தரதரவென இழுத்துச் செல்லப்பட்டும் தங்களுடைய நிலை மாறி சிறையில் வாடியவர்கள் யார்? என்பதையும் மக்கள் அறிய வேண்டும். தங்களுடைய சொத்துகளையும் வருமானங்களையும் சுதந்திரப் போராட்டதால் இழந்து வறுமைப்பட்டு ஈன்றெடுத்த தாய் தந்தையருக்கு ஆதரவளிக்க முடியாமலும் தாம் பெற்றப் பிள்ளைகளைக் கவனியாமலும் கல்வியின்றி பிழைக்க வழியின்றி குடும்பத்தைத் தவிக்கவிட்ட தியாக வரலாறுகளை அறிந்து கொள்ள வேண்டும்.


மறைமுக உதவி     

போராட்டக் காலத்தில் களத்தில் இறங்காமல் மறைமுகமாக இருந்து பல அரிய சேவைகளையும் தியாகங்களையும் செய்தவர்கள் பலருண்டு. வெள்ளையருக்கு பயம் கொள்ளாமல் போராட்ட வீரர்களை மறைத்து வைத்து உணவு உடை பணம் கொடுத்து அதனால் அரசின் துன்புறுத்தல்களுக்குள்ளானோர் பலர்.ஆறுmமுகநேரி மண்ணின் மைந்தர்களான விடுதலைப் போராட்ட வீரர்களை பொதுமக்களுக்கு இனம் காட்ட வேண்டியக் காலச்சூழலில் உள்ளோம். இவ் ஏடு மூலம் சுதந்திரப் போராட்ட இயக்கங்களில் ஆறுமுகநேரியின் தலைசிறந்த பங்கேற்பினை அறிந்து கொள்வது அந்தத்தியாகப் பெருமக்களுக்கு நாம் செலுத்தும் வீர வணக்கங்களாகும். திருச்செந்தூர் தாலுகாவில் நடைபெற்ற இயக்கங்கள் ஆறுமுகநேரிக்கும் உரியனவாகும்.


தியாகி    

“இந்தியா“ இன்று சுதந்திர இந்தியாவாக உலக அரங்கில் மக்களாட்ச்சிக்குச் சான்று கூறுமளவில் தலைநிமிர்ந்து நிற்கின்றது. அதற்குரியவர்கள் இந்திய சுதந்திரப்போராட்ட வீரர்களாவர். கைமாறு கருதாச் சான்றாண்மையே தியாகம். தியாகி என்ற சொல்லில் அதன் பொருள் பொதிந்து உள்ளது. சுதந்திரப் போராட்டக் காலத்தில் இந்தியாவின் தென்பகுதியில் ஏராளமான இளைஞர்கள் தங்களை ஈடுபடுத்திக்கொண்டனர். அவ்வர்ப்பணிப்பால்தான் இன்று நாம் சுதந்திரத்தின் இன்பங்களை அனுபவித்துக் கொண்டிருக்கிறோம்.


தியாகம் 

அகிம்சை என்ற அறவழியான சத்தியாகிரகம் எனும் மாபெரும் சக்தியை  உள்ளத்தில் நிறுத்திப் போராட்டக் களத்தில் நின்று பல இன்னல்களை அனுபவித்த விடுதலை வீரர்கள் பிறந்த மண் இது. அகிம்சை தகாது என்று தீவிரவாதத்தில் குதித்த மண்ணின் மைந்தர்களையும் கொண்ட ஊர் இது.
வெள்ளையருக்கு தங்களுடைய ஆட்சி எல்கைக்குட்பட்ட வரைபடத்தில் தென்கோடியில் திருநெல்வேலி மாவட்டத்தின் ஓர் மூலையில் அமைந்திருந்த திருச்செந்தூர் தாலுகா அடிக்கடி தலைவலியைக் கொடுத்து வந்தது. அனைத்துப் போராட்டங்களுக்கும் தலைமையிடமாக மூளையாக ஆறுமுகநேரி எனும் சிற்றூர் செயல்பட்டு வருகிறது என்பதைப் புரிந்து கொண்டது மாவட்ட நிர்வாகம்.
ஆறுமுகநேரி மக்கள் தொகை சில ஆயிரமாக இருந்த அக்காலத்தில் நூற்றுக்கணக்கான இளைஞர்கள் தங்களைச் சுதந்திரப் போராட்டங்களில் ஈடுபடுத்திக் கொண்டனர்.
            “வந்தேமாதர மென்றுயிர் போம்வரை
            வாழ்த்துவோம் முடி தாழ்த்துவோம்
            எந்த மாருயி ரன்னயைப் போற்றுதல்
            ஈனமோ? அவமானமோ?“
என்று பாரதியின் பாடலுக்கிணங்க ஆர்ப்பரித்து எழுந்தனர்.

சில சோம்பேறிகள் அச்சம் 

“நாடுசுதந்திரம் அடைவதால் யாருக்கு நன்மை? என்று திண்ணையில் உட்கார்ந்து வெட்டிக்கதைப் பேசிக்கொண்டும் சிறியால் முதுகைச் சொறிந்து கொண்டும் கொட்டாவி விட்டுக் கொண்டு ஆடுபுலி ஆடிக்கொண்டிருந்தவர்களிடையே இப்போராளிகளின் போக்குத் தேவையற்றதாகப் பைத்தியக்காரத்தனமாக இருந்தது. பெற்றோராலும் உற்றோராலும் கைவிடப்பட்டு தண்ணீர் தெளித்து விடப்பட்டவர்களாக விடுதலை வீரர்கள் களத்தில் நின்றனர். 
            “சிப்பாயைக் கண்டஞ்சுவர் - ஊர்ச் 
            சேவகன் வருதல் கண்டு மனம் பதைப்பார் 
            துப்பாக்கி கொண்டொருவன் - வெகு 
            தூரத்தில் வரக்கண்டு வீட்டிரொளிப்பார் 
            அப்பாலெ வனோசெல்வான் - அவன் 
            ஆடையைக் கண்டுபயந் தெழுந்துநிற்பார் 
            எப்போதும் கைகட்டுவார் - இவர் 
            யாரிடத்தும் பூனைகள்பொ லேங்கி நடப்போர்”
என்ற பாரதியார் பாட்டுக்கேற்ப காவல்துறையின் கெடுபிடிக்கு அச்சம் கொண்டு வீதியில் நின்று பேசுவதற்கு அச்சம் கொண்டு விலகிச் சென்றனர் உறவினர்களும் நண்பர்களும்.



வீரக்குடிமக்கள்


அடக்குமுறைக்குச் சவால் விடும் வீரக்குடி மக்களாக வீரர்கள் இருந்தனர். உப்பு ஒருபுறமும் நெல் மறுபுறமும் விளைவது வீரத்தையும் விவேகத்தையும் சான்று கூற எனத் தங்களுடைய ஆண்மையால் உணர்த்திய தமிழ்ச்சான்றோர்கள் பிறந்த ஊராகும்.
சுதந்திரதினவிழாவைக் கோயில் கொடை போல தம்முடைய தாய் தந்தையர் பிறந்த நாளெனக் கொண்டாடி விழா எடுக்கும் பண்புடையவர்கள் நிறைந்த ஊர். இவ்வூரின் மண்ணை நெற்றியில் திலகமிட்டு வெள்ளையரை நாட்டை விட்டு விரட்டிய தியாகிகள் பிறந்த ஆறுமுகநேரி மண்ணிற்கு நாமும் உரியவர்கள் என்பதெண்ணி மகிழ்ச்சியடைவோம்.
சுதந்திரப் போராட்டங்களின் தாக்கங்கள் ஆறுமுகநேரியில் 1930 இல் இருந்து புலப்படுகின்றன.



மகாத்மாவின் அறைகூவல்


26.11.1930 இல் அகில இந்திய சத்தியாகிரகம் நடைபெற்றது. 1929 டிசம்பரில் பூரண சுயராஜ்யத் தீர்மானத்தை காங்கிரஸ் நிறைவேற்றியது. 1930 ஜனவரி - 26 இந்தியாவெங்கும் சுதந்திர நாளாக விடுதலை வீரர்களால் கொண்டாடப்பட்டது. சுயராஜ்யத்தை அடைந்தே தீருவது என வீரர்கள் சத்தியம் செய்து கொண்டனர்.12.03.1930 - இல் மகாத்மா தண்டியாத்திரையை மெற்கொண்டார். 16.04.1930 - இல் வெள்ளையரின் உப்புச்சட்டங்களை மீறி மக்கள் உப்புக் காய்ச்சினர். 05.04.1931 - இல் காந்தி இர்வின் ஒப்பந்தம் ஏற்பட்டது. அவசரச்சட்டங்கள். மக்கள் மீதான அடக்குமுறைகள் நீக்கம் செய்யப்பட்டன. 31.12.1931 இல் அகில இந்திய அளவில் சத்தியாகிரகம் பரவியது. அந்நியத்துணிகள் எரிக்கப்பட்டன.            1931-32 ஆம் வருடத்தில் உப்புச் சத்தியாகிரகம் கள்ளுக்கடை மறியல் அந்நியத் துணி எரிப்பு ஆகியவற்றில் பலர் ஈடுபட்டனர். போலீஸ் அடக்குமுறை காரணமாக தண்டுபத்து ஆறுமுகநயினார் தடியடியால் காயம் பட்டு மரணம் அடைந்தார்.
காயல்பட்டினம் கர்ணம் வெங்கிட்டராம முதலியார் வேலையை ராஜினாமா செய்துவிட்டு சத்தியாகிரகத்தில் குதித்தார்.



போராட்டத் துண்டுத்தாள் வழங்குதல்


போராட்டத்துக்குத் தூண்டுகோலாக இருந்த வீரவநல்லூர் வி.வீரபாகுவின் போர் திட்டம் நிறைந்த துண்டுத் தாள்களை வரதராஜீலு நாயுடு கே.டி.கோசல்ராம் காயல்பட்டினம் சம்சுதீன் வரிசை முகம்மது பி.எம்.கே. செய்யது முகம்மது உள்ளிட்ட பல இளைஞர்கள் இரயில்களில் மற்றும் சுவர்கள் உள்ளிட்ட பல இடங்களில் ஒட்டி தாலுகா முழுவதும் போராட்டச் சிந்தனையை பரவச் செய்தார்கள். 1940 அக்டோபாில் “பேச்சுசுதந்திரம் மக்களின் பிறப்புரிமை“ என்ற மந்திரச் சொல்லை வினோபாவே மக்கள் முன் வைத்தார்.
08.08.1942 இல் பம்பாயில் கூடிய அகில இந்திய காங்கிரசில் “வெள்ளையனே நாட்டை விட்டு வெளியேறு என்ற முழக்கம் மகாத்மாவால் எழுதப்பட்டது. மறுநாள் காந்திஜியும் பிற தலைவர்களால் கைது செய்யப்பட்டனர்



முதல்கூட்டம்


1942 ஆகஸ்டு  9ஆம் தேதி அகில இந்திய தலைவர்கள் கைது செய்யப்பட்டனர். கொதித்தெழுந்து ஆறுமுகநேரி. ஆகஸ்டு 11ஆம் தேதி ஆறுமுகநேரி இந்து நடுநிலைப் பள்ளி முன் த.தங்கவேல் நாடார் தலைமையில் பிரமாண்டமான கூட்டம் கூடியது. எஸ்.ஏ.ராமசந்திரடோக்கோ பி.எஸ்.ராஜகோபாலன் எம்.எஸ்.செல்வராஜ் ஆகியோர் பம்பாய் தீர்மானம் பற்றி விளக்கினார்.



கோசல்ராம் அழைப்பு


நாம் நடத்த உள்ள போராட்டத்தின் மூலம் திருச்செந்தூர் தாலுகாவில் அரசு இயந்திரத்தை செயலிழக்கச் செய்ய வேண்டும். அது குறித்து ரகசியமாக கூடி முடிவெடுக்க 12 ஆம் தேதி காலை 8 மணிக்கு சந்தைக்கு முன்புள்ள அரசமரத்தடியில் (காந்தி மைதானம்) கூட வேண்டுமென்று கே.டி.கோசல்ராம் அழைப்பு விடுத்தார்.



உப்பு சத்தியாகிரகம்


ஆகஸ்ட் 12ஆம் தேதி மக்கள் சாரை சாரையாக வந்து கூடினர். அரசு அதிகாரிகளையும் ஊழியர்களையும் ராஜினாமா செய்யும்படி வற்புறுத்த வேண்டும். அரசு நிர்வாகத்தைச் செயலிழக்கச் செய்ய வேண்டும் என்றும் கே.டி.கோசல்ராம் ஆவேசமாகப் பேசினார். தலைவர்கள் கூடியிருந்த மக்கள் கூட்டம் உணர்ச்சிவசப்பட்டு எத்தகைய தியாகமும் செய்யத் தயார் என்று கூறி தலைவர்களின் ஆணையை எதிர் நோக்கி நின்றன. ஆணைப் பிறப்பிக்கப்பட்டது. ஆறுமுகநேரி உப்புப்பாக்டரி அதிகாரிகளின் வீட்டை நோக்கிக் கூட்டம் எழுச்சியுடன் சென்றன.
அதிகாரிகளை ஒவ்வொருவராகப் பார்த்து ராஜினாமா செய் என்று கூட்டம் கோரியது. அதிகாரிகள் அதிர்ச்சிக்குள்ளானார்கள். உப்பளத்தில் சத்தியாகிரகம் தொடங்கியது. (சர்வே எண் 99 இல்) உப்புப்பாத்திகள்  போடப்பட்டன அரசுத்துறை அலுவலகங்கள் அனைத்தும் மூடும்படி செய்யப்பட்டன. தாலுகாவில் நிர்வாகம் தடுமாறியது.


ஆறுமுகநேரியில் போலீஸ் ரெய்டு

ஆகஸ்டு 12இல் உப்புச் சத்தியாகிரகம் நடைபெற்றது. போராட்டத்தின் வேகம் பொதுமக்கள் அனைவரையும் போராளிகள் ஆக்கிவிடுமோ என்று அச்சமடைந்து மாவட்ட கலைக்டர் கெச்மாடியின் கவனம் ஆறுமுகநேரியின் பக்கம் திரும்பியது.ஆகஸ்டு 15 இல் மாவட்ட கலெக்டர் கெச்மாடி சப்கலெக்டர் விண்டகாம்துரை இன்ஸ்பெக்டர் ஜீவானந்தம் மாவட்ட மாஜிஸ்ட்டிரேட் இவர்களுடன் 9 லாரிகளில் ஆயதப்படையுடன் சிவன் கோயில் சந்தையில் முகாமிட்டனர். ஆறுமுகநேரி ஊர் சூறையாடப்பட்டது. விடுதலைப் போராட்ட வீரர்களின் குடும்பம் தெரு என நடவடிக்கை எடுக்கப்பட்டது. சுமார் ஆயிரம் பேருக்கு மேல் சந்தையில் கொடுமையான வெயிலில் ஆடுமாடு போல நிறுத்தி வைக்கப்பட்டனர். தாகத்திற்கு தண்ணீர் கொடுக்கப்படவில்லை. விசாரணைத் தொடங்கியது.

 த.தங்கவேல்
ஆறுமுகநேரியின் காங்கிரஸ் கமிட்டியின் தலைவர் தங்கநகைக் கடைக்காரர் த.தங்கவேல் நாடார் அழைத்து வரப்பட்டார்.” ஏன் இப்படி அரசுக்கு எதிராக வன்முறை செய்கிறீர்கள்“ என்றார் டி.எஸ்.பி ”காந்தி கூறிய அகிம்சாமுறையில் தான் போராடுகிறோம். என்றார் த.தங்கவேல். தபால் அலுவலகத்தைத் தகர்ப்பதும் உப்பு அதிகாரிகளைத் தாக்குவதும் அரசைக் கவிழ்க்கச் சதி செய்வதும்தான் கொள்கையா? என்று உறுமினார் டி.எஸ்.பி. “நாங்கள் இந்த இடத்தில் ஆயிரத்திற்கு மேல் உள்ளோம். நாங்கள் நினைத்தால் உங்களை அழித்து விட முடியும். அவ்வாறு செய்யாமல் இருப்பதே நாங்கள் காந்தியின் அகிம்சா வழியில் நடபவர்கள் என்பதை உணர்த்தும்” என்றார். நகரத் தலைவரைக் கைது செய்தால் குழப்பம் ஏற்படும் என்று கருதிச் சில தினங்களுக்குப் பின் கைது செய்ய உத்தரவிட்டனர்.






எம்.எஸ்.செல்வராஜன்

போராட்ட வீரர்கள் பலர் கைது செய்யப்பட்டனர். அவர்களுள் 20 வயது நிரம்பிய இளைஞன் அஞ்சா நெஞ்சமுடன் தேசப்பற்றுடன் கோசமிட்டார் அவர்தான்எம்.எஸ்.செல்வராஜன்.கைதுசெய்யப்பட்டவுடன்“மகாத்மா காந்திக்கே ஜே வந்தே மாதரம்” என்று கோஷமிட்டார். போலீஸார் அவரைக் கோஷம் போடாதே என்று ஒருவர் அடித்து மற்றவரிடம் தள்ள இப்படியாக அவர் மயங்கிவிழும் வரை அவரைக் கொடுமைப் படுத்தினார்கள். இத்தகைய மரண அடியை எவரும் பெற்றதில்லை.நள்ளிரவு நேரத்தில் சிறைச்சாலையில் அவரது விரல்களை மடக்கி கட்டி நகக் கண்ணிகளில் ஊசி இறக்கினர். ரோமத்தைப் பிடுங்கினர், செங்கல்லை முதுகில் வைத்து தண்ணீர் விட்டு சித்திரவதை செய்தனர்.

 உயிர் அர்ப்பணிப்பு


நாட்டான் தங்கவேல் நாடார் என்பவரை மிருகத்தனமாக அடித்து சிறையில் அடைத்தனர். டி காரணமாக செத்து விடுவாரோ என நினைத்து அவரை சில தினங்களில் வெளியே விட்டு விட்டனர். ஆனால் அவருக்கு கடுமையான அடிபட்டதால் நெஞ்சில் ரத்தம் கட்டி மரணம் அடைந்தார்.


எங்கும் போராட்டம்

அடக்குமுறை அதிகமாக மக்களின் ஆவேச உணர்ச்சி கொந்தளித்து எழுந்தது. தாலுகா முழுவதும் போராட்டம் நடத்தப்படுவதற்காக என்று வெள்ளாளன் விளை காட்டில் மணல்தேரியில் ஆகஸ்டு 17ஆம் தேதி இரவு 8 மணிக்குக் கூட வேண்டுமென்று கோசல்ராம் அழைப்பு விடுத்தார்.அழைப்பை ஏற்று ஆயிரத்துக்கும் அதிகமானவர்கள் கூடினார்கள். கோசல்ராம் தலைமையில் கூட்டம் ஆரம்பமானது.


தாலுகா ஆபீஸ் கருவூலத்தை தாக்கத்திட்டம்

திருச்செந்தூரிலுள்ள தாலுகா ஆபீஸையும் கருவூலத்தையும் தகர்த்து எறிய வேண்டுமென ஏ.எஸ்.பெஞ்சமின் தீர்மானம் கொண்டு வந்தார் சுற்றிலும் மலபார் ஸ்பெஷல் போலீஸ் இருப்பதால் நமது திட்டம் தோல்வியுறும் என்றார் மங்களா பொன்னம்பலம். இத்திட்டம் கைவிடப்பட்டது.


ஆயுதங்கள் வேண்டாமா?

போராட்டத்தில் தங்களைப் பாதுகாத்திட வெள்ளையரைத் தாக்கிடத் தேவையான ஆயுதங்களைக் சேகரிப்பது என்றும் தாலுகா முழுவதுமுள்ள தந்திகம்பிகளை வெட்டித்துண்டிக்க வேண்டும் என்றும் குலசேகரப்பட்டணத்தில் உப்பள வேலை நடக்கவிடாமல் செய்ய வேண்டுமென்றும் ஒவ்வொரு கிராமத்திற்குள்ளும் நமது போராட்டத்தின் வேர்கள் ஊடுருவிச் செல்ல வேண்டும் என்றும் உருக்கமாக வீராவேசமாக வீர இளைஞன் கோசல்ராம் பேசினார்.ஜி.இ.முத்து சித்தன்விளை ஆறுமுக நயினார் போன்றவர்கள் கோசல்ராம் கூறிய கருத்தை உடனே நிறைவேற்ற வேண்டுமென கூறினார்கள்.


கள்ளுக்கடை தீ வைத்தல்

அன்று முதல் தாலுகா முழுமையும் போராட்டம் பல்வேறு வடிவங்களில் எழுச்சி பெற்றது. நாதன் கிணறு பூச்சிக் காட்டில் முன்சீப்களாக இருந்த நாராயண நாடார் சாமி நாடார் ஆகியோரின் தலமையில் சுந்தர லிங்கம் ஸ்ரீ.கந்தசாமி நாடார் உள்பட நூற்றுக்கணக்கான வீரர்கள் கள்ளுகடையை தீ வைத்துக் கொழுத்தினார்கள். கிராமத்தில் யாரும் கள் சாராயம் குடிக்கக் கூடாது எனக் கட்டுப்பாடு செய்யப்பட்டது. மீறியவர்கள் தலைமொட்டையடிக்கப்பட்டு கழுதைமேல் ஏற்றி ஊர்வலமாகக் கொண்டு வரப்பட்டனர். கள்ளுக் குடித்தவர்கள் என்பதற்கு அடையாளமாக “க“ என்று தலையில் மொட்டையடிப்பார்கள். அவ்விதம் மொட்டையடித்த நாவிதர் சிவலிங்கம் என்பவரை அடித்து கைது செய்தது காவல்துறை.


காடுகளை அழித்தல்

அரசுக் காடுகள் அழிக்கப்பட்டன. கிராம முன்சீப் நாராயண நாடார் சுவாமி நாடார் குடும்பங்களைச் சார்ந்தவர்கள் கைது செய்யப்பட்டன. நாராயண நாடாரின் புதல்வர்கள் ஆறுமுகப் பாண்டியன் சிதம்பர பாண்டியன் இருவருக்கும் கசையடிகள் கொடுக்கப்பட்டன. நாதன்கிணறு போலீஸின் தாக்குதலுக்கு உள்ளானது.


குழும்பூர் இரயில்வே நிலையம் எரிப்பு

ஆகஸ்டு 18.ல் கோசல்ராம் தலைமையில் முகமூடி அணிந்த நூற்றுக்கணக்கான போராளிகள் குரும்பூர் ரயில் நிலையம் நோக்கிச் சென்றனர். இரண்டு போலீசார் துப்பாக்கி ஏந்தி நின்றனர். ஆயுதம் தேவை என்று வெள்ளாளன்விளைத் தோியில் கோசல்ராம் கூறியதை நிறைவேற்றும் முறையில் போலீசாரைக் கட்டிப் போட்டுவிட்டு இரண்டு துப்பாக்கிகளையும் முகமூடி வீரர்கள் பிடுங்கினார்கள். ஸ்டேசன் சூறையாடப்பட்டது. தீக்கிரையான ஸ்டேசனலிருந்த கதர் பண்டல் தனியாக பாதுகாத்திட எடுக்கப்பட்டது.     போராட்ட வீரர்களுக்குத் தோட்டாவுடன் இரண்டு துப்பாக்கிகள் கிடைத்தன. கோல்ராமின் மீது தீக்காயங்கள் ஏற்பட்டன. போலீஸ் கைது செய்து விசாரித்த போது கோயில் கொடை விழா தீப்பந்தம் பட்டதாகக் கூறினார்.


தந்திக் கம்பிகளே இல்லாத காட்சி

இத்தகைய தீவிர இயக்கம் பரவியது. குரங்கனி பி.துரைசுவாமி தலைமையில் ஏராளமான போராட்ட வீரர்கள் தந்திக் கம்பிகளையும் காடுகளையும் அழித்தனர்.     தென்திருப்பேரை கடையனோடை மூக்குப்பேரி பகுதிகளில் தந்திக் கம்பிகள் பயனற்றுப் போயின. தகவல் தொடர்பு முடக்கப்பட்டது.


மனித வேட்டையாடிய மனித மிருகங்கள்

இவ்வேளையில் அப்பாத்துரை என்ற டிபுடி சூப்பிரண்டும் சிவானந்தன் என்ற இன்ஸ்பெக்டரும் கிராமம் கிராமமாகச் சென்று போராட்டத்தில் ஈடுபட்டவர்களையும் இவர்களுடைய குடும்பத்தினரையும் கைது செய்து துன்புறுத்தினர். தடியடி தாக்குதல் நடத்தப்பட்டது. வீடுகளை இடித்தும் நெல் அரிசி கருப்புக்கட்டியை மணலில் போட்டு மிதித்தும் சோற்றுப்பானைகளை உடைத்தும் அநியாயம் செய்தனர்.

புதுக்குடிச் சுனையில் இரவு 10 மணி

காவல்துறையின் இத்தகையப் போக்கினைக் கண்டித்திட செப்டம்பர் 9ஆம் தேதி மேலப்புதுக்குடி சுனை அய்யனார் கோயில் முன்பு இரவு 10 மணிக்கு வீரர்கள் கூடினார்கள். புதுக்குடி கிராம மக்கள் பழமும் பச்சரிசிக் கஞ்சியும் துவையலும் பனை ஓலைப் பட்டையில் பாிமாறி உபசரித்தார்கள். எழுச்சிக் கூட்டமாகத் தொடங்கியது.


மரணப்படை

வெள்ளையர் ஆட்சியில் போலீஸ் கொடுமையை எதிர்த்திட வேண்டுமானால் நம்மில் பலர் வெள்ளையரை ஒழித்து விட்டு தற்கொலைக்கும் தயாராக இருக்க வேண்டும். உங்களில் இதற்கு எத்தனை பேர் தயார்? தயார் என்றால் ரத்தக் கையொப்பமிட்டுத் தரவேண்டும் என்று திரு.கோசல்ராம் வீர முழக்கமிட்டார்.


இரத்தக் கையெழுத்து

கடையனேடை மகராஜன் ஆலந்தலை பெஞ்சமின் ஏரல் நடராஜன் செட்டியார் கொட்டங்காடு ஏ.டி. காசி மெய்யன்பரப்பு த.சிவந்திகனி பரமன்குறிச்சி நாகமணிவாதிரி செட்டியாபத்து அருணாசலம் வாழவல்லான் ரா.பச்சைப்பெருமாள் ஆகிய எட்டு பேர் எதற்கும் தயார் என்று ரத்த கையெழுத்து இட்டனர். தீவிரப்பணிகளை நிறைவேற்றும் முயற்ச்சிக்கு கர்ணம் வெள்ளக்கண் நாடார் வள்ளிவ்ளை வடிவேல் துரைராஜ் ஆகியோர் உதவிட முன் வந்தனர்.


அந்நியனுக்கு ஆதரவாகச் சாட்சி சொல்வதா?

போராட்டக்குழுவினர் பூச்சிக்காடு நோக்கிச் சென்றனர். கிராம முன்சீப் சாமி நாடாருக்கு எதிராக சாட்சி சொல்ல நினைத்தவரின் வீட்டைச்சுற்றி சூழ்ந்து கொண்டனர். ”சாட்சி சொல்ல மாட்டேன்” என்ற உறுதிமொழியைப் பெற்ற பின்பு திரும்பினார்கள்.

மெஞ்ஞானபுரம் தபால் ஆபீஸ் தாக்குதல் த தங்கவேல் மீது வழக்கு


16.09.1942இல் சாத்தான்குளம் நோக்கி ஒரு படையும் மெஞ்ஞானபுரம் நோக்கி மற்றொரு படையும் சென்றது. போஸ்ட் ஆபீஸ் தீ வைக்கப்பட்டது மெஞ்ஞானபுரம் போஸ்ட் ஆபீசைத் தாக்கியதாக ஆறுமுகநேரி த.ததங்கவேல் நாடாரை 1வது எதிரியாகவும் மற்றும் 8 பேர்கள் மீதும் வழக்கு போடப்பட்டது. வழக்கு முடிவடையும் 20 மாதம் வரையிலும் த.தங்கவேல் நாடாரும் மற்றவர்களும் சப்ஜெயில்களில் இருந்தனர். 20 மாதம் கழித்து பின்னர் வழக்கு வாபஸ் பெற்ப்பட்டது. வழக்கு வாபசானவுடன் ஜெயிலில் இருந்து வெளிவந்த த.ததங்கவேல் நாடாரை மீண்டும் கைது செய்து பாதுகாப்புக் கைதியாகத் தஞ்சாவூருக்குக் கொண்டுபோய் விட்டனர்.


சப்கலெக்டரைத் தாக்க முயற்சி

செப்டம்பார் 14இல் போராளிகள் பரமன்குறிச்சி போகும்பொழுது “வெள்ளை சப்கலெக்டர் ஒருவர் கார் பஞசராகி ரோட்டில் நின்று கொண்டிருக்கிறார்” என்று தகவல் கிடைத்தது. போலீஸ் அடக்குமுறைக்கும் அட்டூழியத்துக்கும் உத்தரவு போட்ட இந்த கலைக்டரை எப்படியும் மட்க்கிப் பிடிக்க வேண்டம் என்று தேடி ஓடினார்கள் எதிர்பாராதவிதமாக அடுத்து வந்த காரில் அந்த வெள்ளையன் ஏறித் தப்பி பிழைத்து விட்டான்.வீரர்களுக்கு உணவளித்த பெருமை சித்தன்விளை பொிய நாடாரைச் சாரும். குரும்பூர் ரெயில் நிலையம் சதி வழக்கில் கோசல்ராம் கலெக்டர் ஹெச்மாடியால் கைது செய்யப்பட்டார். போராட்டம் தீவிரமடைந்தது.


வீரச்சிங்கங்கள் பி.எஸ்.ராஜகோபால் – காசிராஜன்

பி.எஸ்.ராஜகோபாலன் தலைமை தாங்கினார். ஏ.டி.காசி தேவஇரக்கம் பூவலிங்கம் மந்திரம் ஆகிய இளைஞர்கள் போராட்டத்தில் தீவிரவாதத்துடன் ஈடுபட்டனர். 16 வயதுள்ள நாராயணன் என்ற சிறுவன் போராட்டத்தில் ஈடுபட்டது குறிப்பிடத்தக்கது.


குலசை உப்பளத் தாக்குதல்

1942 செப்டம்பர் 19 ஆம் தேதி இரவு 12 மணிக்கு குலசேகரன்பட்டினம் பைப் லைனில் இராஜகோபால் தலமையில் கூட்டம் நடைபெற்றது. உப்பளத்தில் எப்படி செயல்பட வேண்டும் என்பது பற்றி விளக்கினார். ஒரு போலீஸாருக்கு 3 நபர்கள் வீதம் நியமித்தார். 9 போலீஸ்காரர்களையும் கட்டி போட்டு விட்டு 9 துப்பாக்கிகள் தோட்டாக்களையும் எடுத்துக் கொண்டு புறப்படும் போது தீ வைக்க வேண்டும் என்று தீர்மானிக்கப்பட்டது. இராஜகோபால் தலமையில் 52 பேர்கள் மந்திரம் தலமையில் 15 பேர்கள் சரியாக 3 மணிக்கு குழு செயல்பட்டது. உப்பள அலுவலக கதவை உடைத்துக் கொண்டு மந்திரம் குழு நுழைந்தது.  போலீஸாரின் கைகள் கட்டப்பட்டன. திமிறியவர் கால் வெட்டப்பட்டது. சப்தம் கேட்ட லோன் துப்பாக்கியுடன் வந்தார். மந்திரம் இராஜகோபாலுக்கு தகவல் கொடுத்தார். இராஜகோபால் மந்திரம் காசிராஜன் இ.பி.தங்கவேல் ஆகியோர் மெயின் கேட் அருகே கல்தூண் மறைவில் நின்றனர். மந்திரம் அடித்த பேட்டரி லைட்டைக் கணக்கிட்டு லோன் சுட்டார். குறி தப்பியது. உடனே ராஜகோபால் லோனை நோக்கிச் சுட்டார். இக் குறியும் தவறியது. துப்பாக்கியால் உள்ள பைனட்டால் குத்துவதற்கு ஆயத்தமாகி வந்தார். மந்திரம் முன்பக்கமாக ஓடி திரும்பிய போது மார்பில் பைனட்டால் குத்த அதை தடுத்து திரும்பவே முதுகில் குத்தினார். மந்திரம் கீழே விழுந்தார். அவரை மிதித்தவாறு மார்பில் பைனட்டால் குத்தும் போது காசிராஜன் லோனின் கையை வெட்டினார். பைனட் மந்திரத்தின் சட்டையைத் துளைத்துக் கொண்டு பூமியில் நின்றது. லோனின் தலையிலும் மார்பிலும் வெட்டு விழுந்தது. இ.பி.தங்கவேல் வேல்கம்பால் வலதுபுறம் விலாவில் குத்தினார். லோன் சாய்ந்தார். வீரர்கள் தலைமறைவாயினர்.  இந்த படுகொலையை நடத்தியது யார் என்பதைக்கண்டு பிடிக்க இயலாததால் கிராம் மக்களைத் துன்புறுத்தினார்கள். மாணவர்கள்தான் முகமூடி அணிந்து இத்தனை போராட்டங்களை நடத்தியதாக எண்ணியது. காவல்துறை தாலுகா முழுவதும் பல கிராமங்கள் அதிகாரவர்க்க அரகர்களால் சூறையாடப்பட்டன.


கூட்டு அபராதம்

போலீசாருக்கும் ஆள்காட்டிகளுக்கும் வேண்டாதவர்கள் எல்லாம் வழக்குகளில் சேர்க்கப்பட்டனர். எரியும் வீட்டில் பிடுங்கியது லாபம் என்ற முறையில் வீடுகளிலுள்ள பொன் பொருள் அனைத்தும் கொள்ளையடிக்கப்பட்டன. பல கிராமங்களுக்குக் கூட்டு அபராதம் விதிக்கப்பட்டது.


ஜெயில் கொடுமை

போராட்டத்தில் ஈடுபட்டவர்கள் ஈடுபடாதவர்கள் என சுமார் 500 இளைஞர்கள் கைது செய்யப்பட்டு திருச்செந்தூர் சப் ஜெயிலில் அடைக்கப்பட்டனர். சகிக்க முடியாதவாறு கொடுமைகள் செய்தனர்.          இந்நிலையில் பாதுகாப்புக் கைதியாக கைது செய்யப்பட்ட கோசல்ராம் திருச்செந்தூருக்கு கொண்டுவரப்பட்டார். கோசல்ராம் ஜெயிலில் நடக்கும் கெடுபிடிகளைக் கண்டு வெகுண்டார். உண்ணாவிரதம் ஆரம்பித்தார். அதிகாரிகளிடம் கோபாவேசமாக நிலமைகளை எடுத்துரைத்தார். பலன் மாஜிஸ்திரேட் விசாரணை நடத்தினார். கொடுமைகள் இம்சைகள் ஓரளவு குறைந்தன.

தூக்குத் தண்டனை

பல்வேறு சதிவழக்குகள் பொய் வழக்குகள் போடப்பட்டன. சிறப்பு நீதிபதிகள் நியமிக்கப்பட்டனர். குலசை லோன்துரை கொலை ராஜகோபாலன் காசிராஜனுக்கு தூக்குத் தண்டனை விதிக்கப்பட்டது. எல்லா வழக்கிலும் அவர்கள் எதிரிகளாகச் சேர்க்கப்பட்டனர். இதனால் மற்றவர்களும் 21 மாதங்கள் வரை கொக்கிரக்குளம் சப் ஜெயிலில் வைக்கப்பட்டனர். போராளிகள் சார்பில் டேனியல் தாமஸ் கணபதி ராமய்யர் பாலாஜி ஆறுமுகநேரி மேலவீடு சிவசுப்பிரமணிய நாடார் ஆகியோர் வாதிட்டனர்.


சாக்குச்சட்டை கைவிலக்கு

ஜெயில் வார்டர்கள் அரிசி காய்கறிகளை திருடினார்கள். கைதிகளுக்குப் போதுமான அளவு உணவு கிடைக்கவில்லை. உடனே கோசல்ராம் ராஜகோபாலன் காசிராஜன் ஆகிய மூவரும் சிறையில் சூப்பிரண்டிடம் புகார் செய்தனர். புகாரைக் கேட்டு புகார் செய்த மூவரின் தலையையும் மொட்டை அடித்து சாக்கினால் செய்த சட்டையை அணியும் படிச் செய்தனர். கைகளில் விலங்கு மாட்டித் தனி அறைகளில் அடைத்தனர். உப்பில்லாத கேப்பைக் கூழ் கொடுக்கவேண்டுமென்ற உத்தரவு வந்தது. சிறையில் இருக்கும் வீரர்களை உற்சாகப் படுத்திட நயினார் ஆசாரியும் ஏ.எஸ்.பெஞ்சமினும் தேசிய கீதங்களைப் பாடுவார்கள். கைதிகளின் உணர்ச்சிக் கொந்தளிப்புகளைக் கண்டு அதிகாரிகள் அதிர்ச்சிக்குள்ளவார்கள்.


கைராட்டை

சிறையில் கைராட்டையில் நூற் நூற்கும் பணியில் ஈடுபட்டனர்.


மலமும் தண்ணீரும் ஓடிய சிறையறை

இருவர் மட்டுமே இருக்கக் கூடிய அறையில் 12 பேர் அடைக்கப்படுவார்கள். மலஜலம் கழிக்க சிறைக்குள் ஒரு டின் பீப்பாய் இருக்கும். அதில் ஏறி உட்கார்ந்து மலம் கழிக்க வேண்டும் ஒரு முறை மங்களா பொன்னம்பலம் பீப்பாய்க்குள் விழுந்து உடம்பெல்லாம் மலத்துடன் ஒரு இரவு கழித்தார். கழுவிக்கொள்ள தண்ணீர் தர மறுத்துவிட்டனர்.
குட்டம் மகராஜ மார்த்தாண்டம் குலசை குரும்பூர் சதி வழக்குகளில் சேர்க்கப்பட்டு சிறையில் கடுமையான இன்னல்களுக்குள்ளாக்கப்பட்டார். 21 மாதம் கிளை சிறைகளில் இருந்தார்.கடையnoனோடை மகராஜனைக் குழிக்குள் இறக்கினார்கள். தலைமட்டும் வெளியே தெரியும் அளவுக்கு வைத்துவிட்டு கழுத்தளவுள்ள மண்ணைப் போட்டு மூடினார்கள். போராட்டத்தில் சேராதே என்று பயமுறுத்தினார்கள்.


விடுதலை

குலசை வழக்கில் ராஜகோபாலன் காசிராஜன் ஆகியோருக்கு தூக்குத் தண்டனை விதிக்கப்பட்டது. அதை ஜென்ம தண்டனையாக மாற்றுமாறு காந்திஜியும் ராஜாஜியும் முயற்சித்து வெற்றியும் கண்டார்கள்.கொலையுண்ட லோன் துரையின் சகோதிரிகள் ராஜகோபாலன் காசிராஜனுக்கு கருணை காட்டுமாறு விண்ணப்பம் செய்தார்கள்.சுதந்திரத்திற்கு பின் இருவரும் விடுதலை செய்யப்பட்டனர்.விடுதலைப்போராட்ட வரலாற்றில் திருச்செந்தூர் தாலுகாவில் நடந்த நிகழ்வுகளில் ஆறுமுகநேரியின் பங்களிப்பு தலைமைப்பண்புடன் இருந்தது. தியாகத்திற்குச் சான்றானது

சுதந்திரப் போராட்ட வீரர்கள் மீது போடப்பட்ட வழக்கு பிரிவுகளும் தண்டனைகளும்
செக்க்ஷன் 35(1) Dயின் படிரூ. 20 ஆயிரம் அபராதம் அல்லது 2 மாதம் சிறைத்தண்டனை
இ.பி.கோ 188 பிரிவு6 மாதம் சிறைத் தண்டனை
செக்க்ஷன் 143 அவசரச் சட்டம்
இ.பி.கோ. 147 செக்க்ஷன் 38(5)		1 ஆண்டு சிறைத் தண்டனை
இந்திய பாதுபாதுகாப்புச் சட்டம் செக்க்ஷன் 38(5)1-11-3 தண்டனை
செக்க்ஷன் 38(5)6 மாதம் சிறைத் தண்டனை
செக்க்ஷன் இ.பி.கோ1 வருடம் சிறைத் தண்டனை
இ.பி.கோ 14712 கசையடி - 7 மாதம் சிறை
செக்க்ஷன் 74 (D) உப்புச்சட்டம்6 மாதம் சிறைத் தண்டனை
செக்க்ஷன் 38(5) இ.பி.கோ 149
செக்க்ஷன் 143		சிறைத் தண்டனை
செக்க்ஷன் 143 149 இ.பி.கோ
செக்க்ஷன் 38(5) அவசரச்சட்டம்		2 மாதம் சிறைத் தண்டனை
செக்க்ஷன் 1884 மாதம் சிறைத் தண்டனை
செக்க்ஷன் 56 (4) of இந்திய அவசரச் சட்டம்6 மாதம் சிறைத் தண்டனை
148/7 அவசரச் சட்டம் 111/423 ஆண்டு கடுங்காவல் தண்டனை
செக்க்ஷன் 302/149 அவசரச்சட்டம் 4-ன் கீழ்மரண தண்டனை

Tags: Freedom Struggle

0 comments

Leave a Reply